Verkefni
Skógræktarfélag Íslands kemur að eða annast ýmis verkefni tengd skógrækt, í samvinnu við einstök skógræktarfélög, önnur samtök eða sjóði, fyrirtæki eða einstaklinga, bæði innanlands og utan.
Landgræðsluskógar
Landgræðsluskógar eru umfangsmesta skógræktar- og uppgræðsluverkefni skógræktarfélaganna. Allt frá árinu 1990 hafa félögin séð um gróðursetningu á 300 þúsund til 1 milljón trjáplantna árlega á vegum verkefnisins.
Ræktunarsvæðin eru víðsvegar um landið, vel á annað hundrað samningsbundin svæði, sum þar sem skilyrði til skógræktar eru hvað best og önnur þar sem þau eru mjög erfið, t.d. út við ströndina. Á öllum er stefnt að því að koma upp vöxtulegum gróðri, græða land og auðga.
Samstarfsaðili skógræktarfélaganna í Landgræðsluskógum er Matvælaráðuneytið. Svæðin eru öll opin almenningi.
Yrkja — sjóður æskunnar
Yrkja úthlutar grunnskólabörnum trjáplöntum til gróðursetningar. Árlega gróðursetja á milli sjö og átta þúsund grunnskólanemar, frá í kringum hundrað skólum víðs vegar af landinu, tré á vegum sjóðsins.
Yrkjusjóður var stofnaður árið 1992. Stofnféð var afrakstur sölu bókarinnar Yrkju, sem gefin var út í tilefni sextugsafmælis frú Vigdísar Finnbogadóttur. Sjóðurinn hefur eigin stjórn en Skógræktarfélag Íslands hefur umsjón með honum.
Auglýst er eftir umsóknum snemma á hverju ári. Allir grunnskólar landsins geta sótt um tré, hvort sem er til gróðursetningar að vori eða hausti.
yrkja.is
Kolviður
Kolviður er sjóður sem miðar að því að gera almenningi kleift að binda kolefni í gróðri og jarðvegi á móti losun sinni. Tilgangurinn er að hjálpa til við að draga úr styrk koldíoxíðs (CO₂) í andrúmslofti.
Stofnaðilar Kolviðar eru Skógræktarfélag Íslands og Landvernd. Á Úlfljótsvatni er meðal annars ræktað samkvæmt samningi við Kolvið.
kolvidur.isVinaskógur
Vinaskógur var stofnaður árið 1990 í tilefni Landgræðsluskógaátaksins. Hann er í landi Kárastaða, í nágrenni Þingvalla, og er ætlað að minna á mikilvægi vináttu og friðar meðal manna.
Þar hafa heimsþekktir gestir gróðursett tré, m.a. fjölmargir þjóðhöfðingjar og fulltrúar erlendra ríkja og alþjóðlegra stofnana. Forseti Íslands er verndari Vinaskógar.
Sjálfboðaliðar
Frá árinu 2015 hefur félagið tekið á móti erlendum sjálfboðaliðum Erasmus+ áætlunarinnar, nú í gegnum European Solidarity Corps. Árlega koma fimm sjálfboðaliðar frá jafnmörgum Evrópulöndum og dvelja í fimm mánuði, einkum við gróðursetningu á Úlfljótsvatni og umhirðu eldri reita víða um land.
Félagið hefur gæðavottun (Quality Label) European Solidarity Corps. Einnig koma 2–3 hópar á vegum Working Abroad á hverju sumri, auk sjálfboðaliða frá Seeds og Veraldarvinum.
Umsjón: Vito Famà, vito@skog.is
Landgræðslusjóður
Landgræðslusjóður var stofnaður árið 1944 fyrir atbeina landsnefndar lýðveldiskosninganna og að forgöngu Skógræktarfélags Íslands, til minningar um stofnun lýðveldis á Íslandi. Meginhlutverk hans er að klæða landið skógi, en önnur landgræðsla og gróðurvernd er einnig á verksviði sjóðsins.
Sjóðurinn veitir styrki til verkefna einstaklinga, stofnana og félaga. Umsóknarfrestur fyrir árið 2026 var til og með 27. mars.
Styrkþegar 2026
- Skógræktarfélag Akraness
- Skógræktarfélag Árnesinga
- Skógræktarfélag Austur-Húnvetninga
- Skógræktarfélag Dalasýslu
- Skógræktarfélag Eyfirðinga
- Skógræktarfélag Garðabæjar
- Skógræktarfélag Hafnarfjarðar
- Skógræktarfélag Húsavíkur
- Skógræktarfélag Íslands
- Skógræktarfélag Kjalarness
- Skógræktarfélag Mosfellsbæjar
- Skógræktarfélag Ólafsfjarðar
- Skógræktarfélag Rangæinga
- Skógræktarfélag Reykjavíkur
- Skógræktarfélag skáta við Úlfljótsvatn
- Skógræktarfélag Stykkishólms
Hvatningarverðlaun skógræktar
Verðlaunin eru veitt árlega til að hvetja til dáða einstaklinga, hópa, fyrirtæki, félög eða stofnanir sem vinna óeigingjarnt starf í þágu skógræktar á Íslandi. Að þeim standa Skógræktarfélag Íslands, Land og skógur og Bændasamtök Íslands (skógarbændur).
Tekið er á móti tilnefningum hvenær árs sem er. Verðlaununum er úthlutað á alþjóðlegum degi skóga, 21. mars.
Senda tilnefningu
Græni trefillinn
Græni trefillinn er samheiti yfir skógræktar- og útivistarsvæði á útmörk sveitarfélaganna sjö á höfuðborgarsvæðinu, staðfestur í Svæðisskipulagi höfuðborgarsvæðisins árið 2002.
Að beiðni aðalfundar 2004 hafði Skógræktarfélag Íslands forgöngu um verkefnið í samstarfi við skógræktar- og sveitarfélög. Megintillagan var að leggja Græna stíginn eftir Græna treflinum endilöngum, sem tengir saman útivistarsvæðin og gerir trefilinn að einni heild.
Úlfljótsvatn og Brynjudalur
Félagið stundar sjálft skógrækt á tveimur svæðum. Úlfljótsvatn á félagið með Bandalagi íslenskra skáta og Skátasambandi Reykjavíkur; þar er Landgræðsluskógur, ræktun samkvæmt samningi við Kolvið og eldri gróðursetningar grunnskóla Reykjavíkur á vegum Yrkju.
Í Úlfljótsvatnsbænum rekur félagið lítið gistiheimili sem er opið ferðamönnum frá október til byrjun maí.